Toshkent davlat tibbiyot universiteti talabasi, hindistonlik Muhammad Anis Toshkentdan Dehliga parvoz qilayotgan samolyot bortida 48 yoshli ayolning hayotini saqlab qolgani uchun olqishlanmoqda. Mathrubhumi News ushbu voqea haqida xabar berdi.
Hodisa 29-iyul kuni yo‘lovchi to‘satdan samolyot ichida kasal bo‘lib qolganida yuz berdi. Ekipaj tibbiy yordam so‘rab murojaat qilganidan so‘ng, Toshkent davlat tibbiyot universiteti talabasi Muhammad Anis darhol javob berdi.
Anisning so‘zlariga ko‘ra, u e’lonni eshitishi bilan darhol yordamini taklif qilgan. Yo‘lovchini ko‘zdan kechirgach, u vahima va xavotirlik tufayli kelib chiqqan taxikardiya — yurak urishining tezlashishi epizodini tashxis qildi. Samolyotda mavjud bo‘lgan cheklangan resurslarga qaramay, Anis o‘zini tuta oldi va normal yurak ritmini tiklashga yordam beradigan texnika — karotid sinus massajini qildi. Xabarlarga ko‘ra, ayolning ahvoli 10-15 soniya ichida yaxshilana boshlagan.
«Men hali shifokor emasman, lekin shifokor bo‘lish uchun o‘qiyapman. Bunday vaziyatlarda vahima qilmaslik muhim. Asosiysi, qanday harakat qilishni bilish kerak», — dedi Anis.
Dehlining xalqaro aeroportiga yetib kelgach, bemorni tibbiyot xodimlari kutib olishdi. Bo‘lajak shifokorning o‘z vaqtida aralashuvi tufayli hayot uchun xavfli bo‘lgan vaziyatning oldi olindi.
«Muhammad Anis O‘zbekistonning nufuzli tibbiyot fakultetlaridan birida tahsil oladi, u yerda yuzlab xalqaro talabalar o‘qitiladi. Uning harakatlari yuqori sifatli ta’lim va birinchi tibbiy yordam ko‘nikmalarining muhimligini yana bir bor isbotladi», — deyiladi xabarda.