Tashqi ishlar vaziri Baxtiyor Saidov Daniyaning Oʻzbekistondagi yangi tayinlangan elchisi Yesper Vaxrning ishonch yorliqlarini qabul qildi. Tashqi ishlar vaziri bu haqda o‘zining Telegram kanalida e’lon qildi.
Suhbat davomida ikki tomonlama munosabatlarni mustahkamlash, jumladan, hamkorlikni kengaytirish, iqtisodiy aloqalarni rivojlantirish va boshqa sohalardagi imkoniyatlar muhokama qilindi.
«Tashqi ishlar vazirligi sherikligimizning toʻliq salohiyatini ochish uchun birgalikda ishlashga tayyor. Janob elchiga mamlakatimizda muvaffaqiyatli missiya tilaymiz», – deb yozdi Baxtiyor Saidov.
Oʻzbekiston va Daniya oʻrtasida diplomatik munosabatlar 1992-yil 25-yanvarda oʻrnatilgan. Daniya Oʻzbekiston diplomatik aloqa oʻrnatgan birinchi Yevropa davlati boʻlgan.
Yangi elchi 62 yoshda. U Tashqi ishlar vazirligining markaziy apparatida va Daniyaning bir qator xorijdagi elchixonalarida, jumladan, Turkiya, Ozarbayjon, Isroil, Malayziya va Eronda elchi lavozimlarida ishlagan. 2024-yildan beri Daniyaning Rossiyadagi elchisi sifatida faoliyat yuritgan.
Yesper Vaxr 2024-2025 yillarda diplomatik missiya rahbari sifatida O‘zbekistonda akkreditatsiyadan o‘tgan Yakob Henningsenning o‘rnini egalladi.