Rossiyaning Moskva viloyatida O‘zbekistondan kelgan muhojir 49 yoshli kar va soqov erkakni o‘ldirib qo‘ydi. Bu haqda Moskva viloyati prokuraturasi xabar berdi.
Fojiali hodisa 20-iyul kuni Shchyolkovo shahrida sodir bo‘lgan. Tergov ma’lumotlariga ko‘ra, erkak axlat konteynerlari yonidan o‘tayotgan bo‘lgan, u yerda ikki nafar O‘zbekiston fuqarosi chiqindi terayotgan bo‘lgan. Kar va soqov erkak imo-ishoralar orqali o‘z noroziligini bildirgan, muhojirlar esa buni tajovuz deb talqin qilishgan.
«Bahs davomida 33 yoshli erkak jabrlanuvchining boshiga bir necha marta qo‘llari bilan urgan, keyin esa ko‘kragiga tepgan. Zarba natijasida jabrlanuvchi o‘z bo‘yi balandligidan asfaltga yiqilib, voqea joyida vafot etgan», — deyiladi viloyat prokuraturasi matbuot xizmati xabarida.
Hujumdan so‘ng gumonlanuvchilar jinoyatni yashirish maqsadida jasadni butalar ichiga sudrab olib kirib, voqea joyidan qochib ketishgan.
RBC xabariga ko‘ra, tergovchilar gumonlanuvchini aniqlash va voqealar ketma-ketligini to‘liq tiklash uchun videokuzatuv kameralari yozuvlaridan foydalangan.
Politsiya hujum qilganni qo‘lga oldi. Unga ehtiyotsizlik oqibatida odam o‘limiga sabab bo‘lgan og‘ir tan jarohati yetkazish aybi qo‘yilgan. Sud unga nisbatan sudgacha qamoqqa olish to‘g‘risida qaror chiqardi.