Prezident Shavkat Mirziyoyev tug’ilgan kuni munosabati bilan tabrik yo’llaganlarga minnatdorchilik bildirdi.
«Meni tug’ilgan kunim munosabati bilan yo’llagan samimiy tabriklari va ezgu tilaklari uchun xorijiy davlatlar, hukumatlar va parlamentlar rahbarlariga, xalqaro tashkilotlar liderlariga, taniqli siyosiy va jamoat arboblariga, biznes hamjamiyati vakillariga, mehnat jamoalariga, mahallalarga, keksa avlod vakillariga, xotin-qizlar va yoshlar tashkilotlari faollariga, tadbirkorlarga, shuningdek, mamlakatimizdagi va xorijdagi barcha yurtdoshlarimizga chuqur minnatdorchiligimni bildiraman», – deb yozdi Shavkat Mirziyoyev.
Prezident barcha qabul qilingan tabriklar va iliq so’zlarni, avvalo, O’zbekistonning ko’p millatli xalqi va davlatiga bo’lgan chuqur hurmat, xalqaro hamjamiyat bilan yaqin hamkorlikda amalga oshirilayotgan keng ko’lamli islohotlarni qo’llab-quvvatlash va mamlakatning yorqin kelajagiga bo’lgan ishonch namunasi sifatida qabul qilishini ta’kidladi.
«Barcha tashabbuslarimiz va dasturlarimizni doimo qo’llab-quvvatlab kelayotgan mard va olijanob xalqimizga yana bir bor cheksiz farzandlik muhabbatim va samimiy hurmatimni izhor etaman», – deya ta’kidladi davlat rahbari.
Xalqning ulkan bunyodkorlik mehnati, qat’iyati va fidoyiligi tufayli mamlakat Yangi O’zbekistonni barpo etish va uni dunyoning rivojlangan davlatlari qatoriga olib chiqish yo’lidagi o’z oldiga qo’ygan ulkan maqsadlarga, shubhasiz, erishishi qayd etildi.
24 iyul kuni Shavkat Mirziyoyev 68 yoshga to’ldi. Shu munosabat bilan unga Markaziy Osiyo, Rossiya, Xitoy, Ozarbayjon, Janubiy Koreya, Serbiya, Mo’g’uliston, BAA, Turkiya, Misr, Italiya, Sloveniya, Avstriya davlatlari rahbarlari, shuningdek, bir qator xorijiy tashkilotlar liderlaridan tabriklar keldi.