Vetnamda ob-havo sharoiti yomonlashishi oqibatida sayyohlik kemasi ag’darilib ketishi natijasida kamida 34 kishi halok bo’ldi, bir necha kishi bedarak yo’qolgan.
Hodisa mamlakatning shimoliy qismida joylashgan mashhur sayyohlik maskani bo’lgan Ha Long ko’rfazida sodir bo’ldi.
Xabarlarga ko’ra, yo’lovchilarning aksariyati mamlakat poytaxti Xanoydan kelgan vetnamlik oilalar edi.
Qutqaruv guruhlarining xabar berishicha, qutqaruv operatsiyalari kuchli yomg’ir tufayli qiyinlashmoqda. Hozirga qadar 11 kishi suvdan qutqarildi.
Vetnam chegara qo’shinlari va dengiz flotining bayonotiga ko’ra, Wonder Seas nomli kemada to’satdan bo’ron boshlanishi oqibatida ag’darilib ketganda 53 kishi bo’lgan.
AFP yangiliklar agentligiga berilgan guvohning so’zlariga ko’ra, shanba kuni mahalliy vaqt bilan taxminan 14:00 da (GMT 07:00) osmon qoraygan.
Guvoh «oyoq barmoqlari kattaligidagi do’l toshlari kuchli yomg’ir, momaqaldiroq va chaqmoq bilan birga yog’ganini» aytdi.
Rasmiyning VNExpress yangiliklar saytiga bergan ma’lumotiga ko’ra, 14 yoshli o’g’il bola to’rt soat davomida ag’darilgan korpus ichidagi havo cho’ntagida qolib ketganidan so’ng qutqarilgan.
Kasalxona direktori Le Ngok Dungning aytishicha, qutqarilganlar orasida 10 yoshli bola ham bo’lib, hozirda Bai Chay kasalxonasida ahvoli barqaror.
VNExpress xabar berishicha, hozirgacha topilgan jasadlar orasida kamida sakkiz nafar bola bor.
Qolgan bedarak yo’qolganlarni topish uchun qutqaruv ishlari tun bo’yi davom etishi rejalashtirilgan.
Bosh vazir Fam Min Chin vafot etganlarning oilalariga hamdardlik bildirdi.
Hukumat bayonotida aytilishicha, rasmiylar baxtsiz hodisa sabablarini batafsil tekshiradilar va «qonunbuzarliklarni qat’iy jazolaydilar».
Kuang Nin viloyatidagi Ha Long ko’rfazi, YUNESKOning Jahon merosi ob’ekti bo’lib, yuzlab kichik orollari bilan ajralib turadi va 2019-yilda 4 million sayyohni jalb qilgan.