Janubiy Koreya O’zbekistondan naslli xizmat itlarining oltitasini sotib oldi, bu haqda Davlat bojxona qo’mitasi matbuot xizmati xabar berdi.
Oltita Labrador Retriver Toshkent xalqaro aeroporti orqali Janubiy Koreyaga jo’natildi. Jo’nashdan oldin hayvonlar barcha zarur veterinariya tekshiruvlari va diagnostikalaridan muvaffaqiyatli o’tdi. Xalqaro tashish uchun zarur bo’lgan barcha hujjatlar ham to’ldirildi.
«Bugun Koreya bojxona xodimlari Jessi, Bella, Farona, Rada, Faiz va Fariz nomli xizmat itlarini qabul qilib oldi. Moslashuv davri tugagandan so’ng, ular xizmatga tayinlanadi», – deyiladi xabarda.
Itlar O’zbekiston Milliy kinologiya markazida yetishtirilgan va giyohvand moddalar bilan kurashish sohasida ishlash uchun o’qitilgan. Ta’kidlanishicha, ushbu toifadagi xizmat hayvonlari hozirda xalqaro aeroportlar va dengiz portlarida yuqori samaradorlikni namoyish etmoqda.
«Milliy kinologiya markazi yuqori toifali xizmat itlarini tayyorlash va ularni xorijiy hamkorlarga yetkazib berish bo’yicha eksport salohiyatini doimiy ravishda oshirib bormoqda», – deya ta’kidladi qo’mita.
Agentlik ma’lumotlariga ko’ra, O’zbekistondan Koreya Respublikasiga eksport qilingan xizmat itlarining umumiy soni 12 taga yetdi.