Jizzax viloyatining Sharof Rashidov tumani hokimi Mahmud Xolbutayev va Sirdaryo viloyati Guliston shahar prokurorining o‘rinbosari pora olayotgan vaqtda qo‘lga olindi. Bu haqda Davlat xavfsizlik xizmati (DXX) matbuot xizmati xabar berdi.
Xabarlarga ko‘ra, Sharof Rashidov tumani hokimligining qurilish, kommunikatsiyalar, kommunal xo‘jaligi, ekologiya va obodonlashtirish bo‘limi bosh mutaxassisi qurilish MChJ rahbarining ishonchiga kirgan. Mutaxassis hokimning 1,7 gektar yer maydonida sakkiz qavatli binolar qurishga ruxsat olish uchun 30 000 AQSh dollari talab qilganlikda ayblanmoqda. Ushbu yer maydoni tuman hokimining avvalgi qaroriga ko’ra, «Tokchilik» mahallasida umumta’lim maktabi qurilishi uchun ajratilgan edi.
5-iyul kuni bosh mutaxassis so‘ralgan pulning 10 000 AQSh dollarini olib, tuman hokimiga berganlikda gumon qilinmoqda.
8-iyul kuni mutaxassis tadbirkordan qolgan 20 000 AQSh dollarini olib, hokim tomonidan imzolanganligi aytilgan ko‘p qavatli binolar qurishga ruxsat beruvchi hujjatlarni taqdim etgan.
Shundan so‘ng, bosh mutaxassis hokimiyat binosi oldida tuman hokimi bilan uchrashib, unga 10 000 AQSh dollari berayotgan vaqtda Davlat xavfsizlik xizmati xodimlari tomonidan ularning noqonuniy harakatlariga chek qo‘yilgan.
Hozirda Sharof Rashidov tumani hokimining daxlsizlik huquqi bekor qilingan va unga nisbatan Jinoyat kodeksining 210-moddasi bilan jinoyat ishi qo‘zg‘atilgan. Bosh mutaxassisga nisbatan Jinoyat kodeksining 168 va 211-moddalari bilan jinoyat ishi qo‘zg‘atilgan.
Sirdaryo viloyatida sodir bo‘lgan yana bir hodisada Guliston shahar prokurorining o‘rinbosari Bayovut tumanidagi qishloq xo‘jaligi MChJ rahbaridan 10 000 AQSh dollari talab qilib, o‘z mansabini suiiste’mol qilganlikda gumon qilinmoqda. Bu mablag‘ Bayovut tumani IIB tergov guruhi tomonidan Jinoyat kodeksining 168 va 167-moddalari bilan qo‘zg‘atilgan jinoyat ishida sudgacha qamoqqa olish ehtiyot chorasini qo‘llamaslik va jinoyat ishida gumonlanuvchiga nisbatan ijobiy natijaga erishish uchun so‘ralganligi aytilmoqda.
DXX xodimlari tomonidan o‘tkazilgan tezkor tadbir davomida prokuror o‘rinbosari o‘z xonasida talab qilingan summani olayotgan vaqtda qo‘lga tushganligi xabar qilinmoqda.
Hozirda prokuror o‘rinbosariga nisbatan Jinoyat kodeksining 168 va 211-moddalari bilan jinoyat ishi qo‘zg‘atilgan.
Ikkala holatda ham ayblanuvchi mansabdor shaxslarga nisbatan qamoqqa olish ehtiyot chorasi qo‘llanilgan va tergov harakatlari olib borilmoqda.