Oʻzbekiston Ichki ishlar vazirligi matbuot xizmatining xabariga koʻra, Interpol kanallari orqali qidiruvda boʻlgan fuqaro Litvadan Oʻzbekistonga ekstraditsiya qilindi.
Interpol Milliy markaziy byurosi (MMB) Toshkent xodimlarining kuzatuvida Jinoyat kodeksining 168-moddasida nazarda tutilgan firibgarlik jinoyatini sodir etganlikda ayblanayotgan fuqaro Litvadan Oʻzbekistonga ekstraditsiya qilindi. Oʻzbekiston fuqarosi taqdim etilgan materiallar asosida xalqaro qidiruvga berilgan edi.
Interpol kanallaridan foydalanish orqali qidiruvdagi shaxs Litvada ekanligi aniqlandi, u yerda ushlanib, ekstraditsiya jarayoni yakunlanmaguncha hibsga olingan.
Oʻzbekiston Bosh prokuraturasining soʻrovini tasdiqlashdan soʻng, Litva tomoni gumonlanuvchini ekstraditsiya qilish va uni sodir etilgan jinoyat uchun jazoga tortish toʻgʻrisida qaror qabul qildi.
Islom Karimov nomidagi Toshkent xalqaro aeroportida qidiruvdagi shaxs Oʻzbekistondagi Interpol MMB vakillari tomonidan respublika huquqni muhofaza qilish organlari xodimlariga topshirildi.
Taʼkidlash joizki, bu Toshkent va Vilnyusdagi Interpol Milliy markaziy byurolari oʻrtasida ekstraditsiya jarayonida hamkorlikning birinchi holati boʻlib, bu mamlakatlar oʻrtasida xalqaro jinoyatchilikka qarshi kurashda hamkorlikni yanada kengaytirish va mustahkamlashga yoʻl ochadi.