Andijon va Toshkent viloyatlarida imtiyozli kreditlar olishda yordam berish evaziga pul talab qilganlikda gumonlanayotgan shaxslar qo‘lga olindi.
Bosh prokuratura huzuridagi Departamentning xabar berishicha, Andijon shahrida fuqarolar M.T. va ilgari sudlangan H.A. fuqaro D.M.ning ishonchiga kirib, tijorat bankidagi yuqori lavozimli shaxslar bilan aloqalari orqali 300 million so‘m imtiyozli kredit olishda yordam berishni va’da qilgan.
Ular ushbu rejaning bir qismi sifatida 1000 AQSh dollari olayotgan vaqtda qo‘lga olingan.
Ohangaron tumanida esa fuqaro T.E. fuqaro N.A.ga Olmaliq shahridagi tijorat bankidan 150 million so‘m imtiyozli kredit olib berishni va’da qilgan.
U 1100 AQSh dollari olayotgan vaqtda qo‘lga olingan.
O‘zbekiston Respublikasi Jinoyat kodeksining 168-moddasi (firibgarlik) va 28, 211-moddalari (pora berish) bo‘yicha jinoyat ishlari qo‘zg‘atildi. Hozirda tergov harakatlari olib borilmoqda.