O‘zbekiston Prezidenti Shavkat Mirziyoyevning Mongoliya davlat tashrifi 25-iyun kuni yakunlandi.
Prezident matbuot xizmatining xabar berishicha, O‘zbekiston rahbarining Mongoliya zaminiga ilk tashrifi ikki tomonlama munosabatlarda yangi sahifa ochib, ko‘p qirrali O‘zbekiston-Mongoliya hamkorligini rivojlantirish uchun muhim imkoniyatlar yaratdi.
24-iyun kuni Ulan-Batorda O‘zbekiston rahbari Prezident Uxnaagiyn Xurelsux bilan tor va kengaytirilgan formatda muzokaralar o‘tkazdi. Muzokaralar, ayniqsa, savdo, iqtisodiyot va sanoat sohalarida amaliy hamkorlikning istiqbolli yo‘nalishlariga qaratildi.
Muzokaralar yakunida Har tomonlama strategik sheriklik munosabatlarini o‘rnatish to‘g‘risida Qo‘shma deklaratsiya imzolandi.
Ikki davlat prezidentlari o‘z turmush o‘rtoqlari hamrohligida ikki mamlakat san’atkorlarining qo‘shma konsertida ishtirok etdi. Bugun ertalab O‘zbekiston rahbari va uning turmush o‘rtog‘i «Ix Tenger» majmuasiga tashrif buyurdi, u yerda prezidentlar va birinchi xonimlar daraxt ekish marosimida ishtirok etdi. Shuningdek, ular birgalikda an’anaviy «Naadam» o‘yinlari namoyishini tomosha qilishdi.
Tashrif dasturi yakunlangach, O‘zbekiston Prezidenti Toshkentga jo‘nab ketdi. Aeroportda oliy martabali mehmonlarni Mongoliya tashqi ishlar vaziri Batmunx Battsetseg va boshqa rasmiylar kuzatib qo‘ydi.